SFE og Eviny jaktar nye eigarar for telekomselskapet Enivest

Med hovudkontor i Førde har Enivest vore ein nøkkelaktør i utbygginga av fiberinfrastruktur på Vestlandet.Enivest har om lag 50 tilsette og har opplevd ein sterk vekst sidan starten i 2001. I dag er selskapet eitt av dei største innan fiberkommunikasjon på Vestlandet, med 28 000 kundar.

– Vi er stolte over kva Enivest har betydd for å utvikle regionen gjennom å byggje kritisk infrastruktur. Selskapet har både levert sterke resultat og medverka til å utvikle eit solid kompetansemiljø av teknologiarbeidsplassar på Vestlandet, seier Ragnhild Janbu Fresvik, konsernsjef i Eviny.

Endra konkurransesituasjon
Fibernettet i regionen er no tilnærma ferdig utbygd, og ny regulering inneber frivillig opning av nettet frå 2026. Dette endrar konkurransesituasjonen, men opnar også for nye moglegheiter.

– Vi har vore ein naturleg og riktig eigar i den fasen der det viktigaste har vore å byggje ut fiberinfrastruktur på Vestlandet. No er nettet i hovudsak på plass, og bransjen er i rask endring, mellom anna som følgje av frivillig opning av nettet. I denne nye marknadsfasen meiner vi at Enivest fortener eigarar med spisskompetanse på vidare utvikling og kommersialisering av fibertenester, seier Knut Arild Flatjord, konsernsjef i SFE.

Dei to konsernsjefane meiner at tida er moden for at andre eigarar saman med Enivest kan vidareutvikle tilbodet til dei 28 000 kundane på Vestlandet.

Selskapet ABG Sundal Collier har fått oppdraget med å leggja til rette for salsprosessen. Prosessen er godt i gang.

Ser lyst på framtida

Administrerende direktør i Enivest, Nandor Helgheim, meiner selskapet har eit godt utgangspunkt for vidare vekst.

– Enivest står sterkt i regionen med eit solid kundesegment og dyktige medarbeidarar. Vi har bygd ein plattform for vidare vekst, og nye eigarar vil få eit svært godt utgangspunkt for å utvikle selskapet vidare. Vi er offensive og ser lyst på framtida for Enivest og kundane våre, seier Helgheim.

Fakta om Enivest
Enivest er eigd av Eviny (55,8 %), SFE (40,3 %), Tussa IKT (1,7 %), Nandor Helgheim (1,4 %), Sunnfjord kommune (0,7 %) og Hyllestad kommune (0,1 %). Selskapet har lokasjonar i Førde, Sogndal, Florø, Stryn og Sunnhordland.