SFE i ny drakt

Sidan 2003 har vi hatt logoen vi kjenner i dag – eit symbol på samlinga av krefter då SFE blei eit konsern gjennom kjøp og fusjonar av fleire lokale kraftselskap i regionen vår. Historia vår tek oss tilbake endå lenger – over 100 år, då Sogn og Fjordane fekkstraum til både industri og hus. Dagens logo har tent oss i over 20 år, og no er det tid for eit nytt kapittel.

SFE har utvikla seg mykje, ikkje minst dei siste åra. I dag er kraftproduksjon vår hovudverksemd, medan våre deleigde selskap Linja og Wattntek seg av straumnett og straumsal. Vi har store ambisjonar for framtida, og det ønskjer vi å vise – med ein ny profil som både peikar framover og tek vare på historia vår.

Den nye logoen til SFE er meir enn eit nytt design – den speglar kven vi er, og kvar vi skal. Den spisse forma peikar oppover og gir assosiasjonar til fjell og landskap – naturen som er fundamentet for fornybar energi. Ho minner oss òg om ambisjonane våre, og drivkrafta som ligg bak alt vi gjer. Med dynamiske, men mjuke former symboliserer ho ei tydeleg retning og ei framtidsretta visjon: Vi skaper den fornybare framtida.

Dette er ein logo for det nye SFE – eit selskap i utvikling, med klare mål og sterke røter. For røtene og historia vår tek vi vare på. Den nye logoen er utvikla med gjenkjenning i tankane. Vi skal vere tydelege, men ikkje starte heilt på nytt. 

Det vil ta tid før vi har ny profilering på plass overalt. Du vil sjå oss i ny drakt i det digitale, i annonsering, profilering på arrangement og på bilane våre med meir. Når det kjem til skilt på bygg, sponsorskilt og logo på drakter til alle våre mange sponsorpartnarar, tek vi oss tid, og byter logo når skilt og drakter skal likevel skal fornyast. På den måten sparer vi i lag både miljøet og kroner.

Det handlar om å vere moderne, ansvarleg og framtidsretta – på lag med både folk og natur.

Velkomen til det nye SFE!