Kraft i Vest 2026 - Ta risiko, sats tidleg og bygg på det vi gjer rett

- Årets konferanse gav innblikk, inspirasjon og motivasjon til å gjere det vi må - ta modige val for framtida, sa konsernsjef Knut Arild Flatjord i SFE etter konferansen.

For 14. gang samla næringskonferansen kraftbransjen, politikarar og næringslivet elles på Vestlandet til ein felles møteplass. Ei kompetent, variert og spanande gruppe føredragshaldarar var henta inn til fjordlandsbyen for å utforske og inspirere til handlekraft. Tidleg vart det klart at temaet knapt kunne vore meir relevant, i den urolege tida vi er inne i.

Etter opningsinnlegg av konsernsjef Knut Arild Flatjord og Alfred Bjørlo i Drivkraft, tok teknologioptimist og digitaliseringsekspert Eirik Norman Hansen oss med gjennom den pågåande KI-revolusjonen, og var tydeleg på å vere nysgjerrig og å ta i bruk den nye teknologien. Gjermund Eide, mellom anna tidlegare militær rådgjevar for Jens Stoltenberg i Nato, tok over stafettpinnen. Han oppmoda deltakarane om å ikkje vere naive i møte med dei militære trugslane vi ser i dag og snakka varmt om opprusting av forsvaret.

Neste ut var tre markante leiar frå Sogn og Fjordane. Dagleg leiar Trond Teigene i Sparebank 1 Sogn og Fjordane, CEO Ingvill Hestenes i Convene og direktør for Innovasjon Norge i Danmark, delte sine erfaringar som leiarar. Dei la vekt på kor viktig det for ein leiar å tole å stå i krevjande situasjonar over tid, samstundes som ein må ta risiko og satse tidleg nok for å oppnå best mogleg resultat.

Gründer og investor Sindre Kvalheim tok oss med på si reise med Lefdal Mine Datacentre AS i Nordfjord. Han understreka kor viktig det er å bygge fleire datasenter i Noreg, men også korleis den store interessa for utbygging legg press på kraftsystem og natur. Tidlegare leiar av Greenpeace og Naturvernforbundet, Truls Gulowsen, følgde opp med sine synspunkt der han uttrykte bekymring rundt det auka kraftbehovet sentera kan medføre. Han ønska meir fokus på potensialet for å frigjere eksisterande kraft gjennom energisparingstiltak.

I den påfølgande samtalen var dei to samde om viktigheita av at nasjonale og lokale myndigheiter legg føringar for den veksande bransjen. Leiar i Stiftinga Drivkraft, Alfred Bjørlo let seg imponere av diskusjonen: - To smarte og kunnskapsrike folk som faktisk lytta til kvarandre og søkte å finne løysingar, ikkje berre skyttargraver. Til inspirasjon!

Stortingspolitikarane Marius Langballe Dahlin (MDG) og Torbjørn Vereide (Ap) avslutta med den første konferansedagen med sine synspunkt sett i lys av politiske program og målsettingar. Etter ein festkveld på Gloppen hotell med lokalt lam på menyen, byrja dag to med utdeling av den prestisjefylte Driv-prisen for grøn innovasjon i Vestland fylke. Fylkesordførar Jon Askeland (Sp) stod for utdelinga. Bastal frå Førde stakk av med sigeren og premien på 200 000 kroner for si løysing for å flatpakke armering som bidreg til lågare transportutslepp og kortare byggetid i byggebransjen.

Sjefsøkonom Kjersti Haugland i DNB fortalde deretter om situasjonen i verdsøkonomien og korleis den påverkar heimlege forhold, der det høge rentenivået og den nylege rentehevinga vart trekt fram.

Den erfarne NRK-journalisten og tidlegare USA-korrespondenten Tove Bjørgås følgde opp utanriksperspektivet med sitt foredrag om korleis USA har endra seg sidan ho byrja å studere der på seint 90-tall. – Hjartet mitt blir berre meir og meir knust av kor vanskeleg alt har blitt,sa ho. Bjørgås tok oss med på ei reise heilt frå maktas korridorar i Washington DC, til den amerikanske landsbygda og den aukande avstanden og avmakta til myndigheitene mange kjenner på der. Ho skildra eit land fylt av velstand og framtidstru då ho kom dit som ung student, til eit USA prega av polarisering og frykt i dag.

Tidlegare statsråd for Senterpartiet og no prosjektdirektør for Norsk Kjernekraft, Ola Borten Moe, var nestemann på scena. Han snakka om eit reknestykke han meiner ikkje går opp utan at kjernekraft også blir ein del av den norske energimiksen. Utbyggingstakta av ny kraft er for låg i forhold til dei veksande industriane sitt behov, meiner han, og fryktar velstandsnedgang om industrien ikkje får tilgang på meir kraft.

Konserndirektør i Sognekraft Produksjon, Erlend Bårgard, fortalde om korleis dei har lukkast med å bygge ut relativt store vasskraftverk dei siste åra, når det elles har vore roleg på utbyggingsfronten i Noreg. Han framheva ein innovativ metode med bruk av tunellar som vassmagasin, som ein medverkande faktor til dette.

Også på dag to var Truls Gulowsen, tidlegare leiar i Naturvernforbundet og Greenpeace, i aksjon. Denne gang i samtale med Ola Borten Moe og Knut Arild Flatjord i SFE om korleis ein kan sikre nok kraft til utvikling. Flatjord peika på viktigheita av meir effektive offentlege prosessar og føreseielege rammevilkår for kraftbransjen, medan Gulowsen igjen minna om potensialet for å hente ut kraft gjennom energieffektivisering. Moe på si side, ivra for å få sleppe til med kjernekraft raskt, og meinte at oppgradering og utbygging av fornybar energi ikkje vil vere nok for å dekke komande kraftbehov i Noreg.

Sist ut under årets konferanse var Bjørn Mannsverk. Sidan 2017 har han vore mentaltrenar for Bodø/Glimt, og i media blir han omtalt som ein viktig del av den store suksessen fotballaget har oppnådd både nasjonalt og internasjonalt dei siste åra. Mannsverk prata mellom anna om viktigheita av å jobbe hardt over tid og å bli meir bevisst på å gjere riktige og gode val.

- Fokuser mindre på å rette opp feil, bygg i staden vidare på det du gjer rett, oppmoda Mannsverk.

Intervju med Alfred Bjørlo og Knut Arild Flatjord etter konferansen

Vi tok ein prat med Knut Arild Flatjord og Alfred Bjørlo for å høyre arrangørane sine synspunkt på årets konferanse. Nytt av året var at Drivkraft var med på arrangørsida. Drivkraft vart skipa i 2025 av Sparebank 1 Sogn og Fjordane og Sparebankstiftinga Sogn og Fjordane. Tidlegare stortingsrepresentant for Venstre, Alfred Bjørlo frå Nordfjordeid, leiar stiftinga.

Kva har vore Drivkraft si rolle og kva trur du Drivkraft tilfører konferansen?

- Forhåpentlegvis kan vi vere med på å forsterke samanhengande mellom kraft i tradisjonell kraftbransje-forstand og krafta som må kome etterpå for å skape vekst og utvikling. Drivkraft har eit formål som handlar om å styrke vekstkrafta i heile næringslivet i både Sogn, Sunnfjord og Nordfjord. Vi er ikkje bundne til éin bransje eller éin region i fylket. Det gjer at vi kan kople kraftsaka til næringsutvikling meir generelt.

Han reflekterer over korleis han kjenner seg att i mentaltrenar Bjørn Mannsverk sine poeng:

- Det med å fokusere mindre på feil er ein viktig observasjon, og gjeld i høgste grad lokalsamfunn og regionar i Sogn og Fjordane, seier han og følgjer opp:

- Det er ei enorm skaparvilje og idétilfang i næringslivet vårt. Det som stoppar oss er tre andre ting: Mangel på kapital, mangel på kraft og byråkrati. Vi har laga eit samfunn der ting tar altfor lang tid. Vi lagar ei utgreiing til, vi krev ei avklaring til, vi har eit samfunn som er enormt opptatt av risikoen ved å gjere noko, men undervurderer risikoen ved IKKJE å gjere nok. Kort sagt: Handlekraft. Det er eit «systemproblem», men må løysast, slår Bjørlo fast.

På spørsmål om kva Knut Arild Flatjord tek med seg frå årets konferanse, svarar han:

- At den teknologiske utviklinga vil gå raskare enn nokon gong framover og vi som både individ og organisasjon må greie å kapitalisere på denne utviklinga. Å utvise handlekraft er noko alle vil og mange får til, men mange står også att med ein god plan. Det handlar om å gå frå ord og planar, til prestasjon og handlekraft. Det gjeld å skru på det rette «mindsettet» og komme seg på jobb! Årets konferanse gav innblikk, inspirasjon og motivasjon til å gjere det vi må - ta modige val for framtida.

Årets tema var handlekraft. Kva betyr dette for SFE og korleis skal organisasjonen jobbe for å vere handlekraftig i tida framover?

- SFE har lang historie med å vise handlekraft. Gjennom mange år har SFE helde seg til sitt samfunnsoppdrag som er å få fram ny kraftproduksjon og bidra til samfunnsutvikling. Mellom 2020 - 2022 sette selskapet i drift kring 400 nye GWh med kraft.

SFE viste også handlekraft når vi gjekk inn som investor på eit tidleg stadie i Lefdal Mine Datasenter - ei investering som gjorde at andre større aktørar vart med og gjorde at datasenteret vart realisert.

For oss handlar handlekraft om å levere på vårt oppdrag - sikre høg oppetid på våre eksisterande anlegg, skape nye moglegheiter for å få fram ny kraftproduksjon, vere fremst i den teknologiske utviklinga og ikkje minst vere ein pådrivar for grøn omstilling i vår region. Dette krev modige val og handlekraft - og SFE har folka og moglegheitene til å gjere nettopp dette!