Godt resultat for SFE

SFE <picture/>

Sogn og Fjordane Energi (SFE) leverte eit resultat etter skatt på 257 millioner for 2024. Eigarane kan vente seg eit utbytte på 150 millionar kroner.

Fleksible anlegg skaper meirverdiar
Trass i at gjennomsnittleg kraftpris i SFE sitt prisområde NO3 i fjor var 32,6 øre/kWh, 11,3 øre/kWh lågare enn gjennomsnittsprisen i 2023, oppnådde selskapet eit godt resultat.
- Mange av vasskraftanlegga våre er godt egna til å regulere produksjonen raskt opp og ned, alt etter behovet for straum i marknaden. Statnett er avhengig av fleksible produksjonsanlegg for å sørge for balanse mellom produksjon og forbruk i straumnettet i Noreg. Her er det inntekter å hente for selskap med slike anlegg som vi har, seier konsernsjef Knut Arild Flatjord.

I 2024 gav intradag- og balansemarknadane til Statnett ekstra inntekter til SFE på 126 mill. kroner. Dette er ein viktig grunn for at resultatnedgangen ikkje var større trass ein kraftig reduksjon i spotprisen samanlikna med i fjor.
-Med fleksible anlegg sikrar vi viktige meirinntekter i periodar med lågare prisar, og det er viktig for å kunne gje eigarane våre gode og stabile resultat. I tillegg er det stor verdi for samfunnet vårt, seier konsernsjefen.

Utløp i sjø
Fleire av kraftstasjonane til SFE har utløp rett i sjøen, noko som bidreg til at ein stor del av produksjonen kan regulerast raskt.

-Kraftanlegg med utløp i vassdrag har ikkje like stor fleksibilitet som kraftstasjonar der vatnet går rett i sjøen etter å ha vore gjennom turbinen. I vassdrag er det derimot strenge restriksjonar til mellom anna minstevassføring, for å sikre at ein ivaretar økosystemet i elvestrekninga nedstraums av kraftverket, seier Flatjord.

SFE produserte 2146 GWh i 2024. Dette er 116 GWh meir enn i 2023. I 2023 leverte SFE eit rekordresultat på 556 millionar kroner, men her utgjorde
regnskapsmessige gevinster frå fusjonar mellom nettselskapa Linja og Mørenett og fiberselskapa SFE Fiber og Enivest 264 millionar.

Største investeringa i SFE-historia
I år startar SFE bygginga av nye Øksenelvane kraftstasjon. Med ein kostnad på 1,2 milliardar blir det den største investeringa for SFE nokon sinne, og det blir óg ein av dei største kraftutbyggingane i Noreg i dag.

Den nye stasjonen vil gje både 21 GWh meir straumproduksjon og nær firedobla effekt med sine 110 MW, noko som betyr at kraftverket er rusta for å levere energi når marknaden treng det. Den nye kraftstasjonen skal stå klar for å produsere i 2028.

Utbytte fordelt på eigarar:

Aksjonærar 31.12.2024

Utbyte

 

 

Sogn og Fjordane Holding AS

74 282 090

Eviny AS

55 212 500

Kinn kommune

6 959 757

Gloppen kommune

5 182 966

Bremanger Eigedom AS

3 704 377

Askvoll kommune

2 217 303

Stad kommune

2 363 585

Sunnfjord kommune

115 484

Totalt

150 038 064

Førebels årsrekneskap 2024